Ferðaáætlun 2026

Söguferð um Súðavík --- 1 skór ---
Bæjarganga um Súðavík
Laugardaginn 30. maí

Fararstjórn: Bragi Þór Thoroddsen, sveitarstjóri Súðavíkurhrepps.
Mæting kl. 10.00 við Bónus á Ísafirði og 10.20 við bensínstöðina í Súðavík.

Gamla Súðavík, nýja Súðavík, Langeyrin og svæðin á milli. Gleði- og sorgarsögur um það sem gerði þorpið að því sem það er í dag. Vangaveltur um fortíð, nútíð og framtíð.
Láglendisganga með lítilli hækkun. Vegalengd 3-5 km. Göngutími: 2-3 klst.

Folafótur --- 2 skór ---
Laugardaginn 6. júní

Fararstjórn: Barði Ingibjartsson.
Mæting kl. 9.00 við Bónus á Ísafirði og 9.20 við bensínstöðina í Súðavík.
Farið á einkabílum að sumarhúsi Barða í Hestfirði. Fært flestum bílum nema þeim allra lægstu.
Fallegt og sérkennilegt landsvæði. Fararstjórinn er þar vel kunnur og kann margar sögur.
Láglendisganga með lítilli hækkun. Vegalengd: alls um 16 km, göngutími: 7-8 klst.

Kirkjuból – Kroppstaðarskál - Þverdalur --- 2 skór ---
Laugardaginn 13. júní

Fararstjórn: Stefán Pálsson.
Mæting kl. 11:00 við Kirkjuból í Korpudal. Fyrri dagurinn í göngum um innanverðan Önundarfjörð.

Gengið upp í Kroppstaðarskál og upp bratta skriðu á Bæjarfjall. Það er erfiðasti hluti göngunnar. Eftir stutta göngu um hásléttuna er farið niður Þverdal. Gengið með ánum Þverá og Korpu uns komið er niður á veg og er þá þessum hring nánast lokið. Landslagið á þessari hringleið er fjölbreytilegt og frá mörgu er að segja; mannlífi, sögu, jarðfræði og lífríki.
Varaleið ef það verður lágskýjað: Gengið fram Korpudal að skessukötlunum í fossinum ofanvið Selaskriðu.

Vegalengd: um 11 km, göngutími: 7-8 klst., hækkun: um 750 m. Varaleið: Vegalengd fram og til baka: um 13 km, göngutími: 6-7 klst., hækkun: um 430 m.
Ferðirnar 13. og 14. júní eru hugsaðar sem helgarferðir fyrir fólk utan norðanverðra Vestfjarða. Þátttakendur fá 15% afslátt á gistingu hjá ferðaþjónustunni í Korpudal. Ekki þarf að panta pláss fyrir tjaldsvæðið en panta þarf fyrir gistingu í húsi: korpudalur@korpudalur.is.

Tungudalur – Tunguhorn - Ekkilsdalur --- 2 skór ---
Sunnudaginn 14. júní

Fararstjórn: Stefán Pálsson.
Mæting kl. 11:00 við Kirkjuból í Korpudal. Fyrri dagurinn í göngum um innanverðan Önundarfjörð.

Gengið upp í Kroppstaðarskál og upp bratta skriðu á Bæjarfjall. Það er erfiðasti hluti göngunnar. Eftir stutta göngu um hásléttuna er farið niður Þverdal. Gengið með ánum Þverá og Korpu uns komið er niður á veg og er þá þessum hring nánast lokið. Landslagið á þessari hringleið er fjölbreytilegt og frá mörgu er að segja; mannlífi, sögu, jarðfræði og lífríki.
Varaleið ef það verður lágskýjað: Gengið fram Korpudal að skessukötlunum í fossinum ofanvið Selaskriðu.

Vegalengd: um 11 km, göngutími: 7-8 klst., hækkun: um 750 m. Varaleið: Vegalengd fram og til baka: um 13 km, göngutími: 6-7 klst., hækkun: um 430 m.
Ferðirnar 13. og 14. júní eru hugsaðar sem helgarferðir fyrir fólk utan norðanverðra Vestfjarða. Þátttakendur fá 15% afslátt á gistingu hjá ferðaþjónustunni í Korpudal. Ekki þarf að panta pláss fyrir tjaldsvæðið en panta þarf fyrir gistingu í húsi: kirkjubol@kirkjubol.is.

Kaldalón - Dalbær - Steinshús  --- 1 skór ---
Sunnudaginn 21. júní

Fararstjórn: Emil Ingi Emilsson.

Lagt af stað kl. 08.00 frá bílastæðunum við Bónus á Ísafirði. 

Keyrt inn í Kaldalón innst í Ísafjarðardjúpi þar sem við tekur gönguferð í stórbrotnu landslagi inn að Drangajökli. Að gönguferð lokinni verður komið við í Dalbæ og Steinshúsi.

Vegalengd um 7 - 8 km, göngutími um 4 klst, upphækkun svo lítil að það tekur því ekki að nefna hana.

Klukkulandshorn í Dýrafirði --- 2 skór ---
Laugardaginn 27. júní

Fararstjórn: Sighvatur Jón Þórarinsson.
Mæting kl. 9.00 á einkabílum við Bónus á Ísafirði.

Gengið frá bílastæði utan við Mýrar. Farið upp hjá Meira-Garði og gengið þaðan út og upp í Litlagarðshvílftina. Þaðan er farið yfir í Meiragarðshvílftina og uppúr skarðinu sem leið liggur. Þegar upp er komið er haldið til vinstri út á Klukkulandshornið og þaðan eftir fjallinu að „grænavatni“. Síðan höldum við austur yfir og förum ofan við Vatnagil og höldum til baka niður Vatnadalinn og fylgjum Kýránni niðureftir og endum svo á sama stað og lagt var upp frá. Tiltölulega létt ganga miðað við lengd og bratta.
Vegalengd: um 12 km, göngutími: 7-8 klst., mesta hækkun um 670 m.

Skógargöngur í Dýrafirði – seinni hluti --- 1 skór ---
Miðvikudaginn 1. júlí

Fararstjórn: Stjórn Ferðafélags Ísfirðinga.
Sögumaður og fræðari: Sæmundur Kr. Þorvaldsson skógfræðingur.
Mæting kl. 17.30 við Bónus á Ísafirði.

Skógrækt í Dýrafirði sunnanverðum verður skoðuð. Ekið á einkabílum milli staða. Lágir fólksbílar ættu ekki að fara inn að Botni. Gengið um skógarreitina, hlustað og talað. Sögumaðurinn og fræðarinn segir sögu trjáreitanna, helstu trjátegundir nefndar og fjallað um vöxt og viðgang trjánna.

Áætlaður tími: 3-4 klst.

Látravík - Hornvík --- 2-3 skór ---
Laugardaginn 4. júlí

Fararstjórn: Stígur Berg og Guðmundur Stefán Gíslason og Áróra Hrönn Skúladóttir.
Mæting kl. 7.00 við Sundahöfn á Ísafirði.

Skutl í Hornbjargsvita að morgni og fólk tekið til baka úr Hornvík seinnipartinn. Það er að segja ef það verður lendandi í Látravík, sem ekki er sjálfgefið. Hópnum verður skipt í tvennt, þar sem ekki er ætlast til að stærri hópar en 15 manns ferðist saman innan friðlandsins. En hvernig sem viðrar og hvaða leiðir verða fyrir valinu er öruggt mál að stórbrotin náttúra svæðisins lætur engan ósnortinn.
Þátttakendur verða að skrá sig á netfang félagsins ferdafelag.isfirdinga@gmail.com, þar sem að þátttakendafjöldi miðast við að 30 manns komist með í ferðina.
Verð fyrir félagsmenn FFÍ: 28.800 kr., verð fyrir aðra: 32.000 kr.

Vegalengd: 7-8 km, göngutími: 6-7 klst., ferðatími í heild 10-12 tímar, mesta upphækkun: 542 m.

Fuglaskoðunarferð í Dýrafirði --- 1 skór ---
Miðvikudaginn 8. júlí

Fararstjórn: Cristian Gallo, vistfræðingur og höfundur appsins Birdspot.
Mæting kl. 17.30 við Bónus á Ísafirði.

Farið á einkabílum að bílastæðinu við Dýrafjarðarbrú. Fuglalífið við brúna skoðað. Gengið að Botnsá þar sem geymdir verða einkabílar til að sameinast í.
Vegalengd: 7.5 km, göngutími og fuglaskoðun: 3-4 klst. Lítil hækkun og alltaf gengið á vegi.

Skálavík – Bakkaskarð - Galtarviti --- 2-3 skór ---
Laugardaginn 11. júlí

Fararstjórn: Guðmundur Stefán Gíslason og Áróra Hrönn Skúladóttir.
Mæting kl. 10.00 við Bónus á Ísafirði.
Gengið er frá Skálavík inn Bakkadal, tekin stefna upp í Bakkaskarð sem er snarbratt. Í mesta brattanum er vaður, til að auðvelda göngufólki gönguna upp skarðið. Þannig má fikra sig upp meðfram klettabelti í rólegheitum. Þegar upp í skarðið er komið blasir við Norðdalur þar sem leið liggur niður að Galtarvita við Keflavík. Þar verður áð og farið yfir sögu og töfra Galtarvita.

Vegalengd: alls um 12 km, göngutími: um það bil 8-10 klst., heildarhækkun: um 970 m.

Tjaldanesdalur – Kirkjubólsdalur --- 2 skór ---
Laugardaginn 18. júlí 

Fararstjórn: Þórir Örn Guðmundsson.
Mæting kl. 8.00 við Bónus á Ísafirði.

Komið saman á Þingeyri. Ekið á nokkrum bílum að Tjaldanesdal þar sem gangan hefst. Gengið er fram allan dalinn og upp í skarðið milli Tjaldanesdals og Göngudals í Kirkjubólsdal. Þaðan niður Göngudal og eftir Tröllagötum í Kirkjubólsdal að Hofi og áfram að bílunum sem voru skildir eftir.

Vegna tilfæringa með bíla og fólk þarf fólk að skrá sig í ferðina fyrir 11. júlí á ferdafelag.isfirdinga@gmail.com

Ferðin er ókeypis en hverjum farþega er bent á að borga skutlara sínum 3.000 kr.

Vegalengd: um 11 km, göngutími: um það bil 5-6 klst., hækkun: um 500 m.

Eyðibyggðir Arnarfjarðar – Álftamýri að Lokinhömrum --- 1 skór ---
Laugardaginn 25. júlí

Fararstjórn: Jörundur Garðarsson.
Mæting kl. 8.00 á einkabílum við Bónus á Ísafirði og kl. 9.30 við afleggjarann að Auðkúlu. Sameinast í bíla sem komast yfir vöð og grófan veginn til Álftamýrar.

Þetta er önnur ferðin í þriggja gangna röð um þetta stórbrotna svæði. Sérstök áhersla er lögð á sögu mannlífsins sem þar var. Mestöll gangan er á vegslóða og það er lítið um brattar brekkur.
Áætlað er að flytja fólk til baka frá Lokinhömrum. Gangi það eftir er gangan 7.5 km og tekur 3-4 tíma. Það má ekki taka lengri tíma, því það er háflóð um kl. 17.40. Þá getur verið ófært undir Skútabjörgum.

Vegna tilfæringa með bíla og fólk þarf fólk að skrá sig í ferðina fyrir 18. júlí á ferdafelag.isfirdinga@gmail.com

Ferðin er ókeypis en hverjum farþega er bent á að borga skutlara sínum 4.000 kr.

Á heimaslóðum --- 2 skór ---
Laugardaginn. 8. ágúst

Fararstjórn: Hermann Gunnarsson og Þorgerður Kristjánsdóttir.
Mæting kl. 9.00 við Bónus á Ísafirði.
Gengið frá Miðhúsum að Svansvík, þar sem ferðin endar. Þetta eru heimaslóðir fararstjóranna. Mögulega verður hægt er að fara í sund í Reykjanesi að ferð lokinni.
Vegalengd: um 10 km, göngutími: 5-6 klst., hækkun: um 200 m.

Grárófa --- 2-3 skór --- Laugardaginn 15. ágúst

Fararstjórn: Sigríður Júlía Brynleifsdóttir og Steinþór Bjarni Kristjánsson.
Mæting kl. 10.00 við Bónus á Ísafirði. Útfærsla á því hvernig bílferðum verður háttað verður kynnt þegar nær dregur.

Gengið verður upp Selárdal í Súgandafirði yfir fjallaskarðið Grárófu og niður Tungudal til Bolungarvíkur. Gömul alfaraleið en nokkuð brött og krefjandi, einkum þegar hún stendur undir nafni, en Grárófunafnið er dregið af þokunni sem þar getur orðið þétt.

Vegna tilfæringa með bíla og fólk þarf fólk að skrá sig í ferðina fyrir 9. ágúst á ferdafelag.isfirdinga@gmail.com

Ferðin er ókeypis en hverjum farþega er bent á að borga skutlara sínum 4.000 kr.

Vegalengd: um 11.5 km, göngutími: 6-7 klst., hækkun: 600 m.

Hrafnseyri, Grélutóftir og Auðkúla --- 1 skór ---
Laugardaginn 22. ágúst

Fararstjórn: Margrét Hrönn Hallmundsdóttir, fornleifafræðingur.
Mæting kl. 9.00 á einkabílum við Bónus á Ísafirði.
Fornleifaferð í samstarfi við menningarsetrið á Hrafnseyri.
Þetta er ekki löng gönguleið en þó er farið meira en þúsund ár aftur í tímann. Fornleifafræðin opnar okkur sýn inn í þann heim sem eitt sinn var. Við erum svo heppin að sú manneskja sem á mestan þátt í að opna okkur þá sýn er einnig afbraðs sögumanneskja og óþreytandi fræðari. Uppgröftur verður að öllum líkindum enn í gangi 22. ágúst. Hressing á kaffihúsinu að göngu lokinni.

Stuttar vegalengdir (um 3 km hvor leið). Ræðutíminn getur hins vegar orðið langur.

Tálknafjörður - Bifröst --- 2 skór ---
Laugardaginn 29. ágúst

Fararstjórn: Kristinn Marinósson.
Mæting kl. 9.00 við Bónus á Ísafirði. Farið á einkabílum að tjaldsvæðinu í Tálknafirði þar sem gangan hefst u.þ.b. kl. 11.30. Nú hafa verið merktar og stikaðar gönguleiðir upp af Tálknafirði. Þær eru ólíkar að lengd og gerð en kallast einu nafni Bifröst. Nú er unnið að gerð göngukorts um leiðirnar. Til að fagna nýju merkingunum og kortinu er boðið upp á leiðsögn um nokkrar leiðanna þar sem m.a. má sjá djúpt gljúfur, reisulegar vörður, víðáttumikið útsýni og útivistarmannvirki og hlusta má á þögnina sem ríkir í gili einu. Fararstjórinn á mesta frumkvæðið að stígaverkefninu. Hann er heimamaður sem kann margar sögur. Ferðin hefst og endar við tjaldsvæðið. Þar er kjörið að dvelja til næsta dags, því þá verður önnur ferð á vegum FFÍ í nágrenninu (Ketildölum). Vel má hugsa sér að skreppa í Pottinn að göngu lokinni til að hvíla þreytta fætur og safna kröftum fyrir morgundaginn.

Vegalengd 9-10 km, göngutími 4-5 klst., mesta hækkun: 420 m (heildarhækkun lítið eitt meiri). Hugsanlega verður leiðin svolítið lengri en hér er nefnt. Það fer eftir veðri og vilja fólks.

Ketildalir - Verdalir --- 1 skór ---
Sunnudaginn 30. ágúst

Fararstjórn: Jörundur Garðarsson.
Mæting kl. 11:00 við Skrímslasetrið á Bíldudal. Ekið þaðan á einkabílum. Staldrað við í „Dölunum“ á leiðinni út í Selárdal og gengnar stuttar ferðir frá veginum á völdum stöðum, t.d. verður gengið upp í Innri Hvilft sem er fyrir utan Hringsdal og rifjaðar upp draugasögur. Áætlaður tími með útúrdúrum 2,5 klst. Kl. 13:30: Bílum lagt fyrir utan Krók sem er ysti bærinn í Selárdal og gengið þaðan í Verdali u.þ.b. 2,5 km hvora leið. Að lokinni göngu komið við í kaffi á safni Samúels kl. 15 – 16.00. Þá er mögulegt að stoppa einhvers staðar á leiðinni til baka ef tími vinnst til en gert er ráð fyrir að ferðinni ljúki á Bíldudal kl. 17:00.
Gangi þessi áætlun eftir verður hægt að segja frá starfsemi Hafkalks, en fararstjórinn er öllum hnútum kunnugur í því fyrirtæki.

Stórahvílft – Dýrahvílft í Dýrafirði --- 2 skór ---
Laugardaginn. 5. september

Fararstjórn: Sighvatur Jón Þórarinsson.
Mæting kl. 9.00 við Bónus á Ísafirði. Farið þaðan á einkabílum.
Gengið frá Dýrafjarðargöngum upp í hlíðina neðan við Drangatind og upp í hvílftina austanmegin við tindinn. Þaðan er haldið inn fjörðinn, yfir í Dýrahvílft og komið við hjá „Dýrahaug“. Eftir það er haldið niður að Botnsánni og henni fylgt niðureftir eins og hún nær. Eftir það haldið eftir veginum út að göngum og hringnum lokað. Nokkuð um urð og grjót á leiðinni upp og niður. Vegalengd: um 10 km, göngutími: 5-6 klst., mesta hækkun: um 270 m.

Lónfell --- 2 skór ---
Laugardaginn 12. september

Fararstjórn: stjórn Ferðafélags Ísfirðinga.
Mæting kl. 10.00 við Bónus á Ísafirði. Farið þaðan á einkabílum.
Sagt er að Hrafna-Flóki hafi gefið landinu nafn sitt þegar hann stóð uppi á Lónfelli. Hvað sem segja má um sannleiksgildi þess er harla ólíklegt að við munum sjá firði fulla af ís. En ef skyggni er gott má lofa góðu útsýni. Leiðin er merkt og auðrötuð en grýtt og fremur örðug yfirferðar.

Vegalengd 5-6 km, göngutími: um 3 klst., hækkun: 300 m.